Халқ таълими вазирлиги масъуллари томонидан Самарқанд шаҳридаги навбатдаги таълим муассасалари муаммолари ўрганилди.
Жумладан, шаҳардаги 24-мактабда бўлиб, 11-синф битирувчилари билан мактабни тамомлаш арафасида самимий мулоқот қилиниб, эртанги мустақил ҳаётга қадам қўйишда эгаллайдиган касблари, турмуш тарзи ва ҳаёти фаровон бўлиши учун тўғри касб танланганлиги муҳимлиги тушунтириб берилди.
Ўқувчилар билан турли фанлардан савол-жавоб қилиниб, фаол қатнашган 2 нафар ўқувчига ноутбук тақдим этилди.
Вилоят халқ таълими бошқармасига мактабда ижтимоий-маънавий муҳитни соғломлаштириш, педагогларнинг ўз ишига нисбатан масъулиятини ошириш, ўқувчиларга сифатли таълим бериш бўйича кўрсатма берилди.
Мутасаддилар 19-мактабда ҳам бўлиб, 8-синф ўқувчиларнинг дарс жараёнларида иштирок этилди. Математика, тарих, физика фанларидан ўзлаштириши, касблар ҳақида тушунчалари юзасидан суҳбатлашилди. Мазкур мактабда ҳам 2 нафар фаол ўқувчига ноутбук, тенгдошларига китоблар жамланмаси, мактаб жамоасига телевизор тақдим этилди.
Мазкур мактаб 380 ўринга мўлжалланган бўлиб, амалда 640 нафардан ортиқ ўқувчи қарийб 2 коэффициентда таълим олмоқда. Вилоят ҳокимлиги билан биргаликда келгусида аҳолиси сони ўсишини инобатга олиб, қўшимча бино қуриш учун жой, дастлабки лойиҳа ва ҳисоб-китобларни амалга ошириш тўғрисида ҳудудий бошқармага кўрсатма берилди.
Шунингдек, 1-сонли алоҳида таълим эҳтиёжлари мавжуд мактабда бўлиб, бу ерда ўқувчиларга шароитларни янада яхшилаш учун олиб борилаётган қурилиш ишлари билан танишилди.
Мактабга телевизор тақдим этилиб, ўқувчиларга алоҳида меҳр кўрсатиш, уларни жамиятга мослашиб кетишлари учун коррекцион таълим жараёнларига алоҳида эътибор қаратиш зарурлиги таъкидланди.
