Bugun Prezident Administratsiyasi huzuridagi Axborot va ommaviy kommunikatsiyalar agentligida “Jadidlar izidan” Respublika tanlovini tashkil etish va oʻtkazish jarayonlariga bagʻishlangan matbuot anjumani boʻlib oʻtdi.
Unda Maktabgacha va maktab taʼlimi vaziri oʻrinbosari Farhod Boqiyev, vazirlik masʼul xodimlari, Alisher Navoiy nomidagi Davlat adabiyot muzeyi, Qatagʻon qurbonlari xotirasi davlat muzeyi, Yoshlar ishlari agentligi “Mutolaa” loyihasi vakillari ishtirok etdi.
Taʼkidlanganidek, Maktabgacha va maktab taʼlimi vazirligi tomonidan joriy yilning oktabr-dekabr oylarida oʻquvchilarning mustaqil fikrlash koʻnikmalarini yanada shakllantirish, ularga ajdodlarimizning boy maʼnaviy merosini keng targʻib qilish orqali kitobxonlikka jalb etish maqsadida “Jadidlar izidan” Respublika tanlovi tashkil etilmoqda.
Ilk bor oʻtkazilayotgan mazkur tanlovda ishtirokchi oʻquvchilar jadidlarizidan.uz platformasi orqali onlayn roʻyxatdan oʻtish orqali ishtirok etishmoqda. Tanlovda ishtirok etish uchun 364 906 ta (219 868 tasi 6-8-sinf, 136 944 tasi 9-10-sinf oʻquvchisi, 8 094 tasi nodavlat taʼlim muassasalari oʻquvchisi) ariza kelib tushgan.
Tanlovni samarali tashkil etish hamda oʻquvchilar ongida milliy gʻururni shakllantirish maqsadida 10 118 ta umumtaʼlim maktabida “Jadidlar izidan” klublari tashkil etish rejalashtirilgan. Ayni vaqtda tajriba-sinov tariqasida dastlab 208 ta tuman (shaharda) 1 tadan ushbu klublar tashkil etildi.
Tanlov 6-8-sinf hamda 9-10-sinf oʻquvchilari oʻrtasida tashkil etilib, tuman (shahar) bosqichi shu yilning 31-oktyabr kuni barcha hududlarda bir vaqtda oʻtkazilishi rejalashtirilgan. Ishtirokchilar mazkur bosqichda 2 ta shart (test va savol-javob) asosida bellashishadi.
Har ikki yoʻnalish boʻyicha tuman (shahar) bosqichlarida gʻolib, deb topilgan 416 nafar oʻquvchi tanlovning hududiy bosqichida ishtirok etadi.
Tanlovning hududiy bosqichi joriy yil 12-23-noyabr kunlari, Respublika bosqichi dekabr oyida oʻtkazilishi rejalashtirilgan.
Tanlovning respublika bosqichi yakunlariga koʻra, har bir sinf toifasi boʻyicha eng yuqori ball toʻplagan 7 nafardan (I, II, III oʻrin gʻoliblari hamda eng yuqori ball toʻplagan 4 nafar) jami 14 nafar ishtirokchi xorijiy davlatlarga taʼlim sayohatiga yuboriladi.
Tadbir davomida jurnalistlarning mavzuga doir savollariga mutasaddilar tomonidan atroflicha javob berib oʻtildi.
